Forumi i Mendimit të Lirë Pastrohet parku i Zvërnecit, apel për turizëm pa mbeturina dhe ndëshkim për ndotësit

Pastrohet parku i Zvërnecit, apel për turizëm pa mbeturina dhe ndëshkim për ndotësit

Jun 12, 2017 fml Kryesore 0

Dhjetra vullnetarë nga Tirana së bashku me administratën që menaxhon zonën turistike të Zvërnecit në Vlorë, punuan sot duke mbledhur qindra thasë me mbeturina.

Korpusi i Vullnetarëve përmes aksionit të sotëm në parkun e pishave në Zvërnec bëri thirrje për turizëm pa mbeturina.

Ndotja në parkun e pishave, ishte sërish në nivele alarmante, sikurse edhe vitet e shkuara.

Në këtë park janë mbeturinat e lokaleve ato që prodhojë më shumë ndotje. Në park po ashtu janë mbeturinat që lënë qytetarët.

Korpusi i Vullnetarëve prej vitesh ngre zërin që qeveria duhet të vërë në lëvizje strukturat ligj-zbatuese e të ndëshkojë pronarët e restoranteve, të ndëshkojë qytetarët që frekuentojnë parqet dhe lënë mbeturinat ku të munden.

Nga pushteti vendor kërkohet të vendosë koshë edhe në pjesën e parkut.

Shokues ishte fakti që në parkun e pishave u gjetën qeset me mbeturina, të cilat vullnetarët i kishin grumbulluar vitin e shkuar dhe lënë buzë rrugës, ku pretendohej se do të kalonte makina e komunës për transportimin e tyre.

Aksioni i së dielës në Zvërnec ngre sërish fuqishëm zërin se Shqipëria ka nevojë vërtet të pastrohet dhe mbi te gjitha të ndërgjegjësohen njerëzit që të jenë miqësorë me mjedisin.

Korpusi Shqiptar i Vullnetarëve, lëvizja më e madhe vullnetariste mjedisore në vend, për të 9-tin vit rradhazi do të vijojë javët e ardhshme pastrimin e zonave turistike dhe jo vetëm.